Turismo da Deputación asiste á Xornada Técnica de Destinos Enogastronómicos

A área de turismo da Deputación da Coruña acudiu o luns 3 e este martes 4 á Xornada Técnica de Destinos Enogastronómicos en Cullera (Valencia), organizada por Saborea España.

O vicepresidente e deputado de turismo, Xosé Regueira, foi un dos asistentes ao encontro, do que destacou a oportunidade de aprendizaxe e intercambio de experiencias con outros destinos.

A delegación da entidade provincial en Cullera coincidiu durante a xornada, ademais, con responsables dos Fogóns do Anllóns, un dos plans enogastronómicos da Deputación. O outro é o  Vía Verde Compostela – Tambre – Lengüelle, ambos financiados polo Plan de Recuperación, Transformación e Resiliencia do Goberno de España, financiado pola Unión Europea- Next Generation EU.

O Plan de Sostibilidade Turística en Destino (PSTD) Os fogóns de Anllóns pon en valor  A riqueza natural, histórica e gastronómica do territorio do río Anllóns. O obxectivo é posicionar aos concellos do Anllóns como destinos de referencia de turismo de natureza e gastronómico.

Pola súa parte, o PSTD Vía Verde Compostela – Tambre – Lengüelle recupera un dos itinerarios da rede das Vías Verdes española para a súa posta en funcionamento como ruta de transporte non motorizado, reutilizando un antigo trazado ferroviario existente entre Santiago e A Coruña. O obxectivo é a dinamización do territorio rural polo que discorre a través da posta en valor dos recursos naturais, patrimoniais e gastronómicos dos concellos integrados.