Galicia Ártabra Digital Noticias de Ferrol y la comarca de Ferrolterra.
O presidente do Racing Club Ferrol, Manuel Ansede, imparte este xoves 9 de maio, ás 19:00 horas, na Sala Carlos III da Fundación Exponav, a conferencia “Orgullosos de Ferrol, un sentimento” convidado pola Cátedra Jorge Juan que promove a Universidade da Coruña en colaboración coa Armada e que dirixe a profesora da Escola Politécnica de Enxeñaría de Ferrol (EPEF), Sonia Zaragoza.
Desde unha perspectiva histórica, o presidente do Racing Club Ferrol, Manuel Ansede, fará un repaso aos fitos máis importantes da entidade ao longo dos seus máis de cen anos de vida, desde a súa fundación, en 1919, ao amparo dos estaleiros ferroláns, ata a chegada do Grupo Elite, en 2017, abandeirando un ambicioso proxecto encamiñado, en primeira instancia, a devolver ao club ao fútbol profesional.
Un reto que acadou na tempada 2022/23 co ascenso á LALIGA HYPERMOTION e que supuxo ademais a renovación dos fortes vínculos que sempre existiron entre a cidade departamental e, por extensión, coa súa comarca e o Racing Club Ferrol.
Todo isto, xunto co crecemento exponencial da súa masa social e a aspiración de converter a entidade deportiva nun motor social e económico para Ferrolterra guían un proxecto orientado neste intre á consolidación na categoría de prata do fútbol nacional, profesionalizando o club a todos os niveis e dotándoo dunha estrutura e instalacións indispensables para o seu desenvolvemento e viabilidade.
