O Bono Deporte xa está dispoñible

A delegada territorial da Xunta en Ferrol, Martina Aneiros, reuniuse con representantes da Real Federación Galega de Fútbol e de varios clubs da zona para informarlles que está dispoñible para a súa descarga o Bono Deporte; Unha axuda de 120 euros para a compra de material e equipamento e a realización de actividades deportivas, como a cota dos clubes, clases, monitores ou cursos.

O Bono Deporte está dirixido a nenos de entre 6 e 16 anos federados nalgunha disciplina deportiva ou inscritos no programa Xogade (Xogos Galegos Deportivos en Idade Escolar)

Cada beneficiario disporá como máximo dun único bono a trocar nos establecementos adheridos que na área territorial de Ferrol, Eume e Ortegal ascenden a 44 (entre establecementos comerciais e entidades deportivas ou prestatarias de servizos deportivos).

A listaxe pode consultarse na web bonodeporte.gal , onde tamén se inclúe información sobre o  procedemento e desde onde se poderán descargar os bonos que se emiten en formato dixital, a través dun código QR. Estes poderán descargarse ata o 29 de febreiro, salvo se esgote antes o crédito previsto.

Unha vez descargado, o beneficiario poderá empregalo nas súas compras nos establecementos adheridos ata o 1 de xullo. Descontarase un 80% do custo de cada compra ata esgotar os 120 euros dispoñibles. O importe irase reducindo en función do valor da compra realizada (IVE incluído).