Valdoviño conmemora o Día das Bibliotecas con talleres, teatro e retomando o Foro Literario

A programación arrancará o próximo venres día 21 de outubro co espectáculo «Minguante canta poesía galega» de Miguel Alonso. Dirixido a mozos e persoas adultas, terá lugar na Biblioteca ás 20,30 horas.

Nel, e a través da música da banda de Miguel Alonso, o público poderase achegar a autores actuais e clásicos da literatura galega. A entrada é de balde, sen inscrición previa.

Ó día seguinte, sábado 22, ás 11,30 h, a Biblioteca acollerá o obradoiro creativo «Debuxar letras» con Alba Farto. Para nenos a partir de 8 anos, neste caso é preciso inscribirse previamente na Casa da Cultura dende o luns 17 de outubro ata o venres 21 ou completar prazas.

Nel, as persoas participantes poderán aprender técnicas e estilos para o arte de debuxar letras a man de forma creativa, experimentando coas tintas e realizando deseños propios.

A programación continuará o domingo 23 coa obra de teatro «A viaxe de Mina» de Maio Creacións Artísticas. Con entrada de balde, dará comezo ás 18:00 horas no auditorio da casa da cultura. Unha obra sobre igualdade, respeto e tolerancia como vías para fomentar unha educación igualitaria que elimine ideas preconcebidas e prexuízos de carácter sexista.

O xoves 27 arrancará a segunda edición do Foro Literario. Guiado por Antón Cortizas, contará na primeira sesión coa escritora e tradutora Ana Varela. Para participar, será preciso inscribirse previamente na casa da cultura.

Como broche de ouro á programación, o 30 de outubro a compañía Pedras de Cartón traerá a Valdoviño a súa obra «Quixote». Con entrada de balde, dará comezo ás 18:00 horas no auditorio. A compañía afronta o texto de Cervantes, un dos máis coñecidos da literatura española, en clave de comedia. Cunha estética inspirada no pallaso clásico (moi ó estilo Fellini) e en clave de clown, abordan as escenas máis icónicas da novela, da relación antagónica entre Quixote e o seu escudeiro Sancho.

A programación conta co apoio do programa Ler Conta Moito.

Lea también

Un jurado declara no culpable a la mujer acusada de matar a su marido en Monfero

El Tribunal del Jurado ha considerado a la acusada de matar a su marido en …