Conmemoración do Día Internacional da Danza en Narón

O Concello de Narón organizou  este xoves unha actividade dirixida a alumnado de primeiro e segundo curso de Primaria dos colexios públicos e concertados de Narón para conmemorar o Día Internacional da Danza.

Ás 11.00 horas o Pazo da Cultura acolleu o espectáculo GAIA, que puideron ver os alumnos dos colexios naroneses, con entrada de balde e cuxo desprazamento dende os centros e de regreso abonou o Consistorio, e tamén dun centro de ensino de Pontedeume.

A alcaldesa, Marián Ferreiro, e a concelleira de Ensino, Mercedes Taibo, desprazáronse ó Pazo para presenciar o espectáculo, unha proposta na que as nenas e nenos tiveron a oportunidade de interactuar.

No caso de Narón acudiron escolares dos CEIP Virxe do Mar, Ponte de Xuvia, Piñeiros e A Solaina, dos CPR Santiago Apóstol e Jorge Juan, do CPI do Feal, e do Escola do Val do CRA de Narón, se ben no de Pontedeume procedían do colexio Couceiro Freijomil. En conxunto, presenciaron a actuación uns 650 alumnos dos citados centros, dos que preto de 600 eran de Narón.

O espectáculo, a cargo da compañía Entremáns aborda o tema do cambio climático e do planeta Terra e está recomendado pola Rede Española de Teatros, Auditorios e Circuítos e Festivais de Titularidade Pública.

GAIA está tamén incluído no Circuíto Danza a Escena 2019 e consiste, tal e como indican dende a propia compañía, “nun percorrido singular no que a pintura, a música, o audiovisual e a danza nos axudan a descubrir e comprender a intensidade, o poder e a beleza das características do noso planeta e os seus tesouros naturais”.