O Concello de Narón recibe o premio Mil Primaveras polo proxecto “Do berce á rúa”

A páxina web municipal “Do berce á rúa” www.dobercearua.gal, impulsada dende o Servizo de Normalización Lingüística de Narón, recibiu o premio Mil Primaveras pola súa implicación na promoción do galego, como mellor proxecto estabilizado.

A concelleira de Ensino, Mercedes Taibo, valorou positivamente este recoñecemento na terceira edición do certame, convocado pola Coordinadora de Traballadores de Normalización da Lingua, cuxo fallo se fixo público o luns, día 4 de abril

“Este espazo web, creado no ano 2010, ten unha función lúdica, ao tempo que educativa, e ofrece ás familias que acceden unha gran variedade de recursos en galego pensados para menores de 0 a 6 anos”, explicou Taibo. A oferta é moi variada: contos, vídeos, animacións temáticas, consellos de crianza…e o obxectivo principal é, tal e como recordou a edil naronesa, “buscar a participación das familias nas tarefas de incorporar o galego na comunicación familiar dende o primeiro momento”.

O proxecto serviu tamén de modelo para un programa referente coma o Apego, co que coopera, e a súa presenza na rede soborda os límites do propio municipio. “Achégalle o galego desde o berce” é o lema desta web municipal, que aposta pola participación das familias para incorporar o galego na comunicación dos nenos

A concelleira de Ensino destacou o traballo que se realiza dende o Servizo de Normalización Lingüística de Narón e agradeceu, en nome do Concello, o premio outorgado. Un premio, asegurou, “que é un recoñecemento a ese traballo realizado e tamén á implicación de todas esas familias e persoal de educación que fan uso desta ferramenta web para a crianza en galego”