O BNG pide aproveitar ‘Ferrol Invisible’ para poñer realmente en valor todo o patrimonio

Iván Rivas, portavoz do BNG no Concello de Ferrol, propón ao goberno municipal que aproveite a iniciativa ‘Ferrol Invisible’ para poñer en valor o patrimonio da cidade de xeito real e positivo. É dicir, «que vaia máis alá de visitas concretas para así proxectar ese enorme potencial a recuperar, reclamar e dignificar«.

O portavoz nacionalista, esixiu ao goberno municipal que «abandone a política de apariencias e actos propagandísticos con respecto ao patrimonio da cidade e se poña a traballar na recuperación definitiva sobre o que ten competencias directas e esixa o mesmo para as administracións públicas que teñan propiedades na nosa cidade en estado de abandono total».

Considera que o único «invisible» nesta cuestión son as «accións do goberno de Ángel Mato» para a recuperación do patrimonio usurpado por outras administracións e a súa posta a disposición para a cidadanía así como accións concretas para recuperar o patrimonio municipal. «É curioso que desde o goberno local se chame patrimonio invisíbel a instalacións que pese a estar infrautilizadas son vetadas á cidadania como acontece con moitas instalacións de Defensa na nosa cidade e que poderían comezar pola derruba do muro do arsenal.»

Desde o BNG «se o goberno local está falto de ideas podémoslle refrescar a mente e deixarlle algunhas propostas para a realización desta iniciativa nas súas dúas vertentes mesmo algunhas poderiamos encaixala en ambos proxectos«. O antigo edificio de Facenda, na rúa Madalena, a parcela do Sánchez Aguilera, o Edificio de Aduanas, no porto, a estación de Ferrocarril, o club da Armada no Montón xunto ao parque do Monton, de propiedade municipal, o castro de Esmelle, o barrio de Recimil, o observatorio de Monteventoso, o polígono de tiro de Catabois, o campamento de Prior, propiedade propiedade municipal, «son só alguns exemplos dos máis significativos do patrimonio local que permanece abandonado tanto polo goberno municipal como outras administracións sen que desde a administración local se lles esixa un mínimo de corresponsabilidade coa protección do patrimonio como coa propia cidade de Ferrol«.