Galicia Ártabra Digital Noticias de Ferrol y la comarca de Ferrolterra.
Un total de oito comparsas daranse cita este sábado, día 22, no Festival de Entroido organizado polo Padroado da Cultura de Narón. Así o anunciou a alcaldesa da cidade e presidenta do Padroado da Cultura, Marián Ferreiro, que indicou que das oito, cinco son de Narón e as tres restantes doutros concellos da comarca. Ferreiro avanzou que da cidade participarán as formacións Os Argalleiros, da Gándara; Viagem ao Povo Inuit (Semente de Trasancos), de San Mateo; Troupele, Troupele, tamén da Gándara; Os Parrandolos, de Piñeiros, e Os Colludos (Asociación Cultural ASCM), da Solaina e de fóra de Narón sumaranse á convocatoria as comparsas A Canteira, de Neda; Os Trastos, de Valdoviño e A Revolta, de Ferrol.
O sábado ás 17.00 horas as oito comparsas concentraranse na Praza da Gándara, para saír ás 17.15 horas dende aí cara á pista polideportiva da Solaina, percorrendo as rúas Vigo, Wenceslao Fernández Flórez, as estradas da Trincheira e da Gándara e as avenidas de Santa Icía e A Solaina, coa previsión de iniciar ás 18.00 horas as actuacións das formacións na pista polideportiva da Solaina, donde se instalará unha gran carpa. A formación Inventi Teatro será a encargada de presentar o festival, no que actuará tamén a banda musical Los Mecánicos.
Cada unha das comparsas disporá dun prazo de dez minutos para interpretar o seu repertorio –en galego e sobre temas locais- e as cinco participantes de Narón deben facer unha actuación na súa parroquia e noutra da cidade, no caso de ser posible cun percorrido pola mesma. O Padroado da Cultura realizará unha achega económica de 800 euros para cinco comparsas da cidade que poderá incrementarse en 100 euros máis se participan no programa de dinamización hostaleira e do comercio locais, e de 400 para as tres de fóra de Narón, tal e como se recollía nas bases da convocatoria.
O Festival de Entroido de Narón repartirá varios premios, que no caso das comparsas serán tres figuras en recordo do Día do Entroido para as que reciban a mellor puntuación do xurado, que valorará a orixinalidade dos seus disfraces, o enxeño na crítica feita na actuación, a calidade musical e o que cada unha das actuacións supoña de recuperación do Entroido en Galicia.
En canto ao público que asista disfrazado, optará tamén a premios para os mellores disfraces individuais, de parellas e de grupos. Para poder participar no concurso de disfraces as persoas interesadas deberán anotarse o propio sábado na pista polideportiva da Solaina. Os premios para os adultos serán cestas con produtos de Entroido e, no caso dos menores, libros e entradas para algún espectáculo do Pazo da Cultura.
Ferreiro agradeceu a implicación das comparsas que participarán este ano no Festival do Entroido e que amenizarán coas súas cancións e música as rúas da cidade durante o sábado e tamén nalgúns casos noutras xornadas desta festividade. Así mesmo, animou ás veciñas e veciños da cidade e tamén doutros concellos a acudir o sábado á cita para poder desfrutar da celebración e tamén poder conseguir algún dos premios dirixidos ao público polos seus disfraces.
