Mar Delgado gaña en Carballo e confirma o seu triunfo no Premio de Outono de dúatlon cros

Mar Delgado certificou a súa vitoria no circuíto do Premio de Outono de dúatlon cros na última carreira a pé da proba de Carballo.

Aínda que chegaba con dous minutos de vantaxe sobre as súas perseguidoras, a duatleta do Triatlón Ferrol atopouse en Carballo cunha María Martínez moi hábil no sector ciclista e só a súa carreira final puido darlle a Mar Delgado o título da proba, con 22 segundos de marxe respecto a Martínez, e tamén do premio final do circuíto.

Mar Delgado convértese na primeira gañadora do novo Premio de Outono de dúatlon cros, grazas aos seus ouros de Lousame e Carballo e ao subcampionato de Cerdedo-Cotobade.