Ferrol inicia a súa posta a punto de cara ao Xacobeo cunha marca deseñada polo pintor Eduardo Hermida

As concelleiras de Turismo, María Teresa Deus, e de Patrimonio Histórico, Eva Martínez, mantiveron esta mañá a segunda reunión co Grupo de Traballo do Camiño Inglés, creado recentemente co firme propósito de poñer a punto Ferrol para recibir o ano Xacobeo 2021. Os integrantes, ademais do Concello a través das responsables das áreas implicadas, son a Dioceses Mondoñedo-Ferrol, Autoridad Portuaria de Ferrol-San Cibrao, Centro Comercial Aberto A Magdalena, Asociación de Hosteleros de Ferrolterra, Empresa Mixta de Turismo de Ferrol, Asociación en Defensa do Patrimonio de Ferrolterra, Asociación Cultural Meninas de Canido, Sail The Way, Asociación O Camiño Inglés, Federación de Anpas Concepción Arenal, Foro Ferrol Vivo e as asociacións de veciños de Ferrol Vello, Centro, A Magdalena, Pedro Padrón, Esteiro e Caranza.

No encontro desta mañá acordouse a marca que representará o Camiño Inglés desde Ferrol, un deseño elaborado polo pintor ferrolán Eduardo Hermida e que contou coa aprobación dos asistentes á reunión. Tamén aprobaron a adhesión do Grupo de Traballo na Asociación de Concellos do Camiño Inglés e a creación de tres liñas de actuación: Márketing, mantemento e posta en valor da ruta e, por último, dinamización turística. Deus e Martínez invitaron aos integrantes do Grupo a participar naquelas nas que estean interesados e, deste modo, “poñer o foco en aspectos concretos e aproveitar mellor os recursos dispoñibles”, explicou Martínez Montero.

Neste senso, a edil comentou que “o traballo coordinado de todos os axentes implicados na posta en valor do Camiño Inglés desde Ferrol pode axudar a que se converta nunha importante fonte de ingresos para a cidade, sobre todo como producto turístico”. Pola súa banda, a concelleira de Turismo lembrou que Ferrol consolidouse como o quinto punto de saída de todos os camiños. Só entre xuño e setembro de este ano foron 10.301 as persoas que iniciaron a ruta desde a cidade naval, 825 máis que nese mesmo período de 2018.

Os cinco grandes obxectivos sobre os que xa traballan os integrantes do Grupo son a mellora da sinalización que marca a ruta, o mantenemento do trazado para “garantir o paso dos peregrinos nas mellores condicións”, a creación do que sería o primeiro albergue da cidade, recuperar a ruta por mar e, por último, traballar de forma coordinada entre administracións, entidades, comerciantes e hostaleiros “para aproveitar as sinerxías que ofrece o Camiño Inglés”.

Pendentes dunha reunión co conselleiro de Cultura

A edil de Patrimonio lembrou que o Concello de Ferrol aínda está á espera dunha resposta en relación á reunión solicitada ao conselleiro de Cultura para tratar “asuntos como a creación dun albergue, un aspecto que preocupa moito ao equipo de goberno e que temos que iniciar canto antes debido a que supón unha tramitación moi extensa”.