Galicia Ártabra Digital Noticias de Ferrol y la comarca de Ferrolterra.
O goberno local someterá o próximo xoves 30 de outubro ao pleno da corporación a aprobación inicial do anexo se subvencións nominativas para o exercicio económico 2019, cun importe próximo aos 1,7 millóns de euros. Máis dun centenar de entidades de Ferrol benefícianse destas axudas, destinadas, na súa meirande parte, ás áreas de Benestar e de Deportes.
Logo de que se presentase esta mañá ante a Comisión Informativa de Economía, Facenda, Emprego e Recursos Humanos, o anexo se subvencións deberá obter o visto bo do pleno, para o que se necesita unha maioría simple de votos a favor. Despois abrirase un período de exposición ao público de 15 días hábiles no taboleiro de anuncios do Concello e no Boletín Oficial da Provincia, que comezará a contar ao día seguinte da publicación do anuncio no BOP.
Se durante este prazo non se presentase ningunha reclamación, daríase por aprobado o documento, que entraría en vigor tras a súa nova publicación. No caso contrario, de que si houbese reclamacións, o pleno da corporación municipal debería resolvelas no prazo máximo dun mes e adoitar un acordo definitivo.
