Galicia Ártabra Digital Noticias de Ferrol y la comarca de Ferrolterra.
O alcalde de Ferrol, Ángel Mato, participou esta mañá na octava xornada organizada pola Rede Galega contra a Trata Sexual: Os danos da explotación sexual, que tivo lugar no salón de actos Concepción Arenal do campus de Esteiro con motivo da celebración mañá do Día Europeo contra a Trata de Persoas.
O rexedor participou na mesa da presentación xunto con Julio Abalde Alonso, reitor da UDC; Susana López Abella, secretaria xeral de Igualdade, e Roberto Ferreiro Eimil, da Rede Galega contra a Trata Sexual. Mato, quen agradeceu que se elixise o salón de actos que leva o nome de Concepción Arenal para celebrar o encontro, dixo que o problema que se abordou durante a xornada “ten moito que ver cunha palabra que se abre paso cada vez con máis forza: Igualdade”.
Cualificou a prostitución como “cancro dentro de calquera comunidade”, unha práctica, dixo, que “debe desaparecer para acadar un modelo san de sociedade”. O alcalde lembrou que as cifras que se manexan en España, de 100.000 mulleres sometidas a “esta auténtica escravitude”, supoñen “non xa un escándalo, senón algo certamente insoportable”.
A clave, en quen o demanda
Na súa intervención, Mato recoñeceu que “queda moito traballo por facer” para erradicar esta “forma de violencia contra as mulleres”, e por iso “non se debe adiar nin por un momento”. “Do que estou certo”, engadiu, “é de que a clave non está na persoa que se prostitúe, senón na que demanda esa prostitución”. Trátase dunha cuestión de “respecto”, dixo, “pero tamén de dereitos” polo que “penso que é imprescindible tratala dende un punto de vista legal”.
O alcalde quixo destacar na súa intervención “a coincidencia que existe entre os dous partidos con maior representación parlamentaria respecto da necesidade deprohibir a prostitución”, e engadiu que “é absolutamente necesaria unha lei integral contra a trata con fins de explotación sexual”, unha ferramenta coa que “sancionar penalmente a quen contribúa á prostitución allea ou se beneficie dela”, do mesmo modo que “sancione a demanda e a compra de prostitución”. Somos moitos, apuntou, “os que estamos convencidos de que é o momento de apostar pola abolición”.
Para rematar, Mato desexou que “desapareza esta forma de violencia” e de que xornadas como la de hoxe “pasen canto antes a analizar a historia e non o presente”.
Como remate da xornada, que se alongará durante todo o día con relatorios de expertos no asunto, representarase hoxe no teatro Jofre, ás 21 horas, a obra teatral Invisibles, de Marián Bañobre. As entradas pódense retirar no mesmo teatro, máximo dúas por persoa.
