Miriam Casillas roza a clasificación directa para os Xogos sendo 13°

Miriam Casillas foi 13° no Test olímpico para Toquio 2020 e quedou ás portas de entrar no top-10 da proba, un dos criterios de clasificación directa da selección española.

Despois dunha boa natación, a internacional do Triatlón Ferrol rodou no pelotón perseguidor cunha ducia de rivais e correu forte os 5 km finais, distancia acurtada á metade pola intensa calor na cidade xaponesa e circunstancia que non beneficiou á triatleta de Badaxoz.

Finalmente, Casillas cruzou a meta para ser 13, tras a descualificación das dúas primeiras deportistas ao entrar da man en meta.

Con este resultado, a integrante do club departamental segue a ser a mellor española do ranking olímpico e mantén as súas posibilidades de rematar no top-30 desa táboa para certificar a súa praza para Toquio nesta temporada.