Galicia Ártabra Digital Noticias de Ferrol y la comarca de Ferrolterra.
A xuntanza da Comisión Informativa de Benestar Social, Igualdade, Muller, Xuventude e Patrimonio celebrada esta mañá no pazo municipal serviu, entre outros asuntos da orde do día, para dar conta das bases do Premio Solidario Cidade de Ferrol 2019, que se entregará o próximo decembro. O obxecto do galardón é premiar iniciativas e proxectos desenvolvidos no ámbito da solidariedade, a cooperación e o voluntariado, tanto promovidos por entidades sociais como por persoas físicas. O prazo para presentar propostas abrirase en próximas datas, coincidindo coa publicación das mencionadas bases no Boletín Oficial da Provincia.
A presidenta da comisión e concelleira de Benestar Social, Eva Martínez Montero, aproveitou para explicar que se está estudando que, en próximas edicións, a cerimonia de entrega do premio se volva celebrar nos primeiros días de setembro, como viña sendo tradición, e non en decembro, mes elixido durante os últimos anos.
Dúas categorías a partir do ano que vén
Martínez Montero informou tamén de que se está analizando a posibilidade de ampliar o galardón. Así, a partir do ano que vén crearíase unha segunda categoría do Premio Solidario Cidade de Ferrol dedicada especialmente ao recoñecemento de proxectos de cooperación, mentres que a primeira quedaría para os de voluntariado e solidariedade.
