O Baloncesto Narón, obrigado a gañar para non perder o tren da permanencia

O Baloncesto Narón afronta este domingo -18:00 horas, pavillón municipal da Gándara- un partido transcendental na loita pola permanencia en Liga EBA. O equipo que dirixe Diego Fernández mídese ao último clasificado da Conferencia AB, o Agustinos Lecrerc de León, co obxectivo de acadar unha vitoria que o manteña con opcións de non descender. Consciente da importancia deste encontro, a directiva do Baloncesto Narón vén de anunciar que a entrada ao pavillón será de balde e as persoas que asistan poderán participar nun sorteo de agasallos.

Restan cinco xornadas para o remate da liga e o Baloncesto Narón atópase en postos de descenso (perderían a categoría os tres últimos clasificados e o peor undécimo das conferencias AA e AB, sen ter en conta os axustes que se producirían no caso dos ascensos e descensos de LEB Prata).