Galicia Ártabra Digital Noticias de Ferrol y la comarca de Ferrolterra.
A alcaldesa de Narón, Marián Ferreiro, e a concelleira de Formación e Novas Tecnoloxías, Natalia Hermida, entregaron na mañá deste venres no Auditorio municipal os diplomas de dezanove cursos do Programa Municipal de Formación realizados entre os meses de agosto e decembro deste ano. Estas accións formativas ofertáronse a un total de 271 persoas, das que 208 resultaron finalmente aptas e foron convocadas para recibir hoxe os diplomas que acreditan as titulacións realizadas. Ferreiro e Hermida felicitaron aos homes e mulleres que remataron estes cursos e animáronos a continuar formándose para ter máis facilidades de cara a acceder ao mercado laboral e á busca dun emprego.
Os cursos do Programa Municipal de Formación deste ano realizados desde o pasado mes de agosto foron de: Medio Ambiente no Naval e Prevención de Riscos no Naval; Traballos en altura e verticais; Hixiene alimentaria para manipuladores de alimentos; Primeiros auxilios; Xestión de almacén (con UNE carretillas e PEMP); Limpeza industrial; Preparación obtención permiso C e CAP; Preparación e obtención permiso D e CAP; Fontanería básica; Auxiliar de Cociña e de servizos en hostalería; Cultivos baixo abrigo e manexo de produtos fitosanitarios e Soldadura TIG e MIG, este último subvencionado polo Ministerio de Presidencia. Da área Cemit entregáronse os diplomas, dese mesmo período, dos cursos de Internet e correo electrónico; Tratamento de textos; Follas de cálculo; Bases de datos; Presentacións gráficas; Iniciación á contabilidade e á facturación e Presentacións dixitais eficaces.
A alcaldesa agradeceu a colaboración prestada polas empresas nas que o alumnado realizou, en función dos cursos elixidos, as prácticas, naqueles casos nas que se incluían no programa formativo. “Queremos agradecer a implicación das empresas por darlles unha formación práctica e tamén, nalgúns casos, por ofrecerlles un contrato de traballo ao rematar ese período de prácticas”. Así mesmo, valorou o convenio que o Concello mantén co IES Leixa de Ferrol, a través do que se realizaron os cursos de Hixiene alimentaria para manipuladores de alimentos e Primeiros Auxilios.
