Galicia Ártabra Digital Noticias de Ferrol y la comarca de Ferrolterra.
O concelleiro de Deportes, Román Romero, e o secretario do Club de Golf Campomar, Francisco Alarcón, presentaron esta mañá a I Semana do Golf, unha convocatoria que inclúe dous torneos, un de maiores, que terá lugar este venres e sábado, e outro infantil o domingo día 4. Nestes tres trofeos repartiranse un total de dezasete trofeos, se ben esta convocatoria resérvase tamén un apartado para a iniciación ao golf, tal e como indicaron desde a organización.
O deporte base é unha das apostas tanto da Concellería de Deportes de Narón como do Club de Golf Campomar. Os nenos e nenas interesados en participar poden anotarse no clube naronés para disputar o torneo que se desenvolverá o domingo día 4 entre as 9.00 e as 14.00 horas.
En canto ao torneo de maiores, os días 2 e 3 de novembro, tamén está aberto o prazo para anotarse, se ben este disputarase en horario de mañá e tarde. A maiores destas propostas tamén se impartirán esta semana e a próxima, clases de iniciación ao golf, que terán lugar de luns a venres e os domingos entre as 13.00 e as 18.00 horas, aínda que cabe a posibilidade de concertalas fóra dese período, tal e como indicou Alarcón. Os horarios e días dos torneos están suxeitos a posibles variacións en función das condicións climatolóxicas, tal e como aseguraron os organizadores.
As persoas interesadas en participar nalgunha das propostas desta I Semana do Golf poden facelo nas instalacións do Club de Golf Campomar, no Val, ou ben chamando ao número de teléfono 663 123 398 ou na dirección de correo: gerenciacampomar@gmail.com, donde poden consultar calquera dúbida sobre estas propostas.
Román Romero animou á cidadanía a participar nestas actividades, “algunhas dirixidas a persoas que teñen xa unha serie de coñecementos sobre golf e outras que terán a oportunidade de poder iniciarse neste deporte nas instalacións que este clube ten na parroquia do Val”.
