Penúltima parada internacional de Miriam Casillas en 2018

Miriam Casillas disputará este sábado a Copa do Mundo de Tongyeong como preludio ao seu final de temporada, previsto para o 10 de novembro.

Despois da accidentada proba dos Estados Unidos, na que non lle beneficiou non poder nadar e pasar dun tríatlon a un dúatlon, a estremeña do Triatlón Ferrol poderá volver espremerse na disciplina olímpica sobre distancia esprinte.

A triatleta de Badaxoz, grazas ao top-10 logrado na Copa do Mundo de Sarasota, é actualmente a 130ª do mundo e terá en fronte a deportistas como a xaponesa Ai Ueda, 20ª na clasificación mundial.

Posteriormente, viaxará a Miyazaki para competir na súa última Copa do Mundo do ano.