Galicia Ártabra Digital Noticias de Ferrol y la comarca de Ferrolterra.
O BNG censura a decisión do goberno municipal de non incluír na orde do día do pleno ordinario deste mes a decisión de revocar o acordo plenario adoptado pola corporación ferrolá en 1967 polo que se agasallaba ao ditador Francisco Franco cunha tumba no cemiterio de Catabois.
O BNG afirma que «dilatar esta decisión no tempo, ademais de contradicir as declaracións feitas polo Alcalde desta Cidade nas que aseguraba que este acordo se adoptaría no mes de agosto, supón seguir deixando as portas abertas á posibilidade de que os restos do ditador recalen en Ferrol en pleno debate pola súa exhumación».
O BNG lembra que «este privilexio se suma ao feito de que a familia Franco non ten aboado os impostos municipais correspondentes a esta tumba e que suporía a revocación da titularidade dela mediante un expediente administrativo que este goberno tampouco inicia e que supón un evidente trato diferencial respecto do resto de veciños e veciñas da Cidade».
Para o BNG «estamos perante un novo exemplo da política de simulación da que este goberno fixo o seu leit motiv facendo afirmacións públicas que nas súas labores privadas de goberno contradí».
O BNG salienta que «as dúbidas respecto de cales son as intencións deste goberno respecto da posibilidade de que os restos do ditador recalen en Ferrol non son novas e veñen precedidas polas declaracións do Alcalde da Cidade na que aseguraba que a familia tiña dereito a trasladar os seus restos ao cemiterio municipal e que eran compartidas tanto polo PP como C’s ou as feitas ao longo do mes de agosto instando á familia Franco a solicitar un nicho no cemiterio municipal».
Por estes motivos o BNG lémbralle ao goberno desta cidade que «o poder non merca a ideoloxía só a simula».
Para o BNG «os dereitos da familia Franco rematan onde comezan os dos veciños e veciñas de Ferrol e esta cidade ten dereito a recuperar a súa memoria e a que non se lle estigmatice polo feito de que o ditador nacese en Ferrol».
