Este martes, obradoiro sobre cociña saudable e «menú artabro», organizado polo concello de Narón e o Club Gastronómico

Unha vintena de representantes do sector hostaleiro da cidade participarán este martes pola tarde, entre as 17.00 e as 20.00 horas, no Obradoiro sobre cociña saudable e Menú Ártabro no que se explicarán as características do citado menú. O concelleiro de Promoción Económica, Pablo Villamar, anunciou que Miguel Campos, do restaurante A Gabeira, será o encargado de impartir este obradoiro, no que colabora o Club Narón Gastronómico.

Os asistentes terán a oportunidade de realizar nas instalacións do Centro Municipal de Formación Irmáns Froilaz, na Gándara, unha serie de recetas deste Menú Ártabro, que será a base do programa 100.000 Motivos de Peso. Este menú, tal e como indicaron os responsables da iniciativa é básicamente a dieta Altántica da Costa Ártabra, que abrangue a zona comprendida entre o municipio de Ares e o Ortegal. “O obxectivo final desta proposta é que os hostaleiros da cidade ofrezan nas cartas dos seus establecementos algúns platos do Menú Ártabro, ampliando e mellorando a oferta gastronómica”, apuntou Villamar.

A iniciativa impulsada a través da Concellería de Promoción Económica aposta ademais por fomentar este Menú Ártabro en tódolos fogares de Narón, polo que a comezos do vindeiro mes de xullo se desenvolverán actividades dirixidas á cidadanía en xeral. Nesa ocasión a cita terá lugar no Auditorio municipal e alí os asistentes terán a oportunidade de informarse con técnicos en dietética sobre as vantaxas do consumo dos produtos que integran a dieta Ártabra. Tamén poderán practicar algunhas recetas que lles ensinará un cociñeiro ou cociñeira que asistirán á convocatoria, tal e como indicou Villamar e recibirán as pertinentes explicacións sanitarias a cargo do médico Carlos Piñeiro.

O calendario gastronómico de Narón pretende fomentar entre a cidadanía o consumo de produtos da zona, como o pemento do Couto, o Tomate Negro ou mariscos e peixes da ría, entre outros, para promover hábitos de vida saudables, mellorar a calidade de vida das persoas e previr certas enfermidades.