O BNG afirma que os orzamentos de 2018 son un timo

O Bloque Nacionalista Galego considera que, à vista da proposta de orzamentos municipais de Ferrol para 2018, «estamos diante duns orzamentos que son un timo«. Son un timo porque o alcalde «terá que explicarlle aos veciños e veciñas do concello porque decide gastar o diñeiro en rescatar EMAFESA e non facelo para resolver problemas acuciantes e permanentes que ten esta cidade en barrios como Santa Mariña, Mandiá ou Caranza«. Para os nacionalistas a realidade é que estes orzamentos esconden moitas mentiras e moitos enganos.

O BNG sinala que o primeiro dos enganos, que agochan os orzamentos, é que contemplan un superavit orzamentario de 2 millóns de euros, «algo que é totalmente inaceptábel«. Este superavit se calcula en base aos ingresos e gastos non financieiros e os limites que para calcular estas partidas se estebelece na Lei do PP e os limites fixados por esta lei que este goberno decide rebaixar e daí este superavit. «Ë dicir, este concello despois de non ter orzamentos nos últimos tres anos decide aforrar 2 millóns de euros e a pregunta é, para que?«

Así a resposta a esta pregunta, «atopamola cando vemos que o diñeiro que se lle vai pagar a EMAFESA se declara ampliable, é dicir, que é potestade exclusiva do alcalde decidir ampliar o diñeiro que o concello de Ferrol lle vai entregar a Emafesa. Unha partida que neste proxecto orzamentario está valorada, de primeiras, en 2,5 millóns de euros cando o cálculo que fai EUDITA é de 1,9 millóns vinculados à taxa de depuración.«

O BNG indica, tamén, «que se temos en conta que a declaración de ampliable dos creditos vinculados a EMAFESA significa que para a súa ampliación non teñen que pasar polo pleno é evidente que o aforro que este concello pretende facer, de 2 millóns de euros, ten como destino resolver a situación económica de EMAFESA a costa de non desenvolver os investimentos tan necesarios e urxentes que ten esta cidade«.

É por isto que desde o BNG cremos «que estes orzamentos son un timo ademáis de esconder unha ideoloxía reaccionaria que queda patente non só neste feito senón na evidencia de que o 55% do gasto está destinado ao capitulo II que é o capitulo que recolle as contratacións de empresas externas, traballos desenvolvidos por empresas que non teñen que ver co concello de Ferrol e todo un caixón de xastre no que se acumula a maior parte do destino dos orzamentos para este ano 2018«.

Neste contexto para o BNG resulta «grave que este goberno pretenda enganar aos veciños e veciñas desta cidade desta maneira. Igualmente se a intención do goberno local é rescatar a EMAFESA o primeiro que debería facer o alcalde é dar a cara«.