Concello de Cabanas e hostalería reeditan unha nova edición de “Tapeando Cabanas”

Concello de Cabanas, a través da Concellería de Turismo, e hostalería volven a unirse un ano máis na promoción dos establecementos locais coa organización dunha nova edición do certame gastronómico “Tapeando Cabanas”. Arrancará este venres, 16 de marzo, e continuará sábado e domingo. Fará un pequeno parón durante a semana e regresará ó seguinte venres, 23, así como o sábado 24 e domingo 25 de marzo. Nesas datas, dez establecementos hostaleiros de Cabanas ofrecerán as súas mellores propostas culinarias. Segundo destaca o alcalde, Germán Castrillón, “creacións sorprendentes do máis alto nivel que dan boa proba da calidade dos locais do municipio”. Nesta liña, a edil de Turismo, Esperanza Gayoso, invita a veciños e visitantes a comprobalo por si mesmos e achegarse ós establecementos para degustar as tapas.

Así, A Estrela do Eume propón a tapa denominada “Chámame galega…”, unha hamburguesa 100% da terra con carne de vaca rechea de grelos e castañas con queixo do país sobre picada de chourizo; A Lareira participará cunha sorprendente xelatina de leite de coco; o Ambigú da CCRD San Martiño do Porto aposta por unhas apetitosas boliñas de mexilón con patacas estilo Sanmartín e salsa picante; BK trae un orixinal timbal de lascas de bacallau con pisto templado acompañado de langostino e ali oli de allos tenros; Casa Campos ofrecerá unha deliciosa brocheta caseira con queixo, anchoas, aceitunas e tomates; La Encina aposta por unha tosta chea de sabor con pimento; La Solana intentará repetir o seu trunfo na pasada edición cunha riquísima tosta de chipirón con cebola caramelizada e tomate concasse; O Mesón deleitará ós seus clientes cunha filloa con grelos e gambas; Taberna Frayán ideou un peixe bañado en salsa agridoce acompañado de cortes de Allium cepa e Solanum, e Yellow servirá unha apetitosa cunca de bacallau coas súas verduriñas.

Estas deliciosas propostas poderán saborearse ó prezo de 1,50 euros en horario de cociña. Así mesmo, aqueles que o desexen tamén poderán participar no sorteo de agasallos, selando unha tarxeta que se facilitará nos locais participantes. Ademais, todo o mundo que complete o percorrido polos dez negocios participantes entrará a formar parte dun segundo sorteo con premios como estancias en balnearios.

Un ano máis, os clientes tamén poderán votar pola súa tapa favorita. Do reconto dos seus votos sairá o local coa mellor proposta deste 2018, un título que o ano pasado recaeu no restaurante La Solana.