Galicia Ártabra Digital Noticias de Ferrol y la comarca de Ferrolterra.
O Aldebarán-Intasa de volei inicia este sábado na casa a súa segunda tentativa de ascender á máxima categoría estatal. Tras meterse cunha autoridade indiscutible no playoff, o equipo de Charly Suárez recibirá ás 19.30h. no Pavillón Municipal ao seu máximo rival de grupo durante a liga, o Emevé de Lugo, no que será o primeiro encontro da fase de ascenso, onde, ademais destes dous equipos, tamén pelexarán o Podes i Tales de Manacor e o cvleganes.com. Nada está decidido e por iso desde o club local chaman á máxima asistencia de afección aos partidos, sequera aos que se xogarán na casa este sábado, o 24 de marzo contra o cvleganes.com e o 14 de abril -penúltima xornada- contra o equipo balear. E para que ninguén se despiste, desde onte hai un grande recordatorio no torreón do Concello.
Tras unha fase regular apaixonante que concluíu plena de emoción a pasada fin de semana, os catro mellores equipos da división de prata do volei estatal loitarán no playoff final polas dúas prazas que dan dereito a xogar o ano que vén na Superliga masculina. O Podes i Tales CV Manacor, o cvleganes.com, o Aldebarán-Intasa San Sadurniño e o Emevé comezan este sábado a recta final da temporada cun calendario de seis xornadas que semella deparar moita igualdade e a máxima emoción.
Os dous equipos galegos enfróntanse co obxectivo de iniciar o playoff con vitoria e buscando a supremacía do volei galego na categoría. O Emevé foi o gran dominador do grupo A con unicamente tres derrotas -ademais de levar a Copa Príncipe-, nunha campaña para o recordo. Pola súa banda, o Aldebarán-Intasa San Sadurniño foi o segundo do grupo A con seis derrotas. Os dous partidos xogados na fase regular saldáronse cunha vitoria a domicilio para cada equipo. Os lucenses venceron na ida 1-3 mentres que os de aquí metéronlles un contundente 0-3 no último partido antes das vacacións do Nadal.
Así as cousas mañá pode pasar de todo. Será fundamental o factor bancada para animar o equipo, tendo en conta tamén que o Emevé seguramente traia unha boa presada de seareiras e seareiros. O Aldebarán xogará na casa tres partidos: o de mañá, o do sábado 24 contra o cvleganes.com e o do 14 de abril contra o Podes i Tales Manacor. Quitando a viaxe ás Baleares da fin de semana que vén, os outros desprazamentos tampouco son nada do outro mundo para ir apoiar o equipo da casa: a Lugo o 4 de abril e a Leganés o 21 dese mesmo mes, última xornada e, quizais, día no que se confirme que un dos dous pases á Superliga vén para San Sadurniño.
