Representantes dos concellos de Narón, Ferrol e Neda participaron nunha simulación das rutas turísticas do proxecto Galicia Norte, Mares de Experiencias

Representantes dos concellos de Ferrol, Narón e Neda participaron este luns na simulación de dúas das dez rutas turísticas que integrarán o proxecto ‘Galicia Norte, Mares de Experiencias’, que impulsan o GALP A Mariña-Ortegal e Golfo Ártabro Norte.

En concreto, asistiron o primeiro tenente de alcalde de Ferrol, o concelleiro de Urbanismo e a concelleira de Turismo de Narón, así como a técnica de Cultura de Neda. Tamén se sumaron á visita a presidenta da Confraría de Pescadores de Ferrol, a Asociación de Empresas Turísticas Río Mandeo, o Club de Golf Campomar, a Granxa Escola Belelle, o Club Ferrolvento Windsurf e Belén Rubido de Roteiros, ademais de particulares.

O historiador do Concello de Narón, Andrés Pena, foi o encargado de dirixir a visita, durante a cal explicou a importancia da ponte sobre o río Xuvia e o muíño que se atopa na súa ribeira. Estes recursos forman parte de dúas das dez rutas turísticas que conforman o proxecto ‘Galicia Norte’ e que se presentarán nas próximas semanas.