Galicia Ártabra Digital Noticias de Ferrol y la comarca de Ferrolterra.
Co gallo da conmemoración do Día Internacional contra a Violencia Machista, e cando aínda non queda moi lonxe a celebración do Día das Mulleres Rurais (15 de outubro), o Foro Ferrol Vivo organiza unha mesa redonda na que pretende abordar a violencia de xénero na zona rural. “A violencia machista no rural: a violencia invisibilizada” é o nome desta iniciativa, que terá lugar o mesmo día 25 de novembro, ás doce da mañá, no local social de Esmelle.
Nesta mesa participarán a presidenta da Asociación de Mulleres Rurais de Esmelle, Mariví Fernández Beceiro; a presidenta da Federación de Asociacións de Mulleres Rurais (Fademur) de Galicia, Rosa Arcos; a médica de familia do centro de saúde de Santa Cruz (Oleiros) e experta en violencia machista, Carmen Acuña; e a psicóloga clínica da Unidade de Saúde Mental de Noia, Irene Martínez. O debate será conducido por representantes do grupo de traballo de Igualdade do Foro Ferrol Vivo.
Dende o FFV faise un chamamento á participación nesta mesa redonda non só ás mulleres e homes da zona rural de Ferrol, senón tamén a todas as persoas interesadas no que se ten convertido nunha das máis duras lacras deste século XXI.
O Foro Ferrol Vivo, que está a piques de cumprir o seu primeiro ano de vida, iniciaba precisamente a súa andaina cunha reivindicación relativa á loita contra a violencia machista: a reclamación dun Xulgado específico de Violencia de Xénero en Ferrol para atender como marca a Lei de 2004 ás vítimas.
