A Concellería de Igualdade de Narón abre o prazo de inscrición no programa ConciliaEscola de Nadal

A Concellería de Promoción Social e Igualdade de Narón informa de que este xoves, 2 de novembro, abre o prazo para que as familias que cumpran os requisitos poidan inscribir as súas crianzas no programa ConciliaEscola, unha iniciativa que pretende contribuír á conciliación da vida familiar e laboral. Poderán inscribirse os nenos e nenas de entre 4 e 12 anos que estean empadronados no concello de Narón cando traballen os dous proxenitores ou o pai, nai ou titor legal cando se trate de familias monoparentais.

A concelleira da área, Teresa Sabio, explicou que, como nos anos anteriores, se establecerán dúas quendas: a primeira, do 26 ao 29 de decembro, e a segunda, do 2 ao 5 de xaneiro, ámbalas dúas datas incluídas. O programa desenvolverase na Escola Domirón, pertencente ao Colexio Rural Agrupado de Narón, en dous horarios, a elixir polas persoas solicitantes: de 07,30 a 14,00 horas ou de 09,00 a 14,00. Cabe a posibilidade de facer uso do transporte –no primeiro horario só de volta e no segundo, tamén de ida- co obxectivo de facilitar o máximo posible o acceso á actividade.

A folla de inscrición pode descargarse na web do Concello –www.naron.es- ou no Rexistro Municipal, onde obrigatoriamente haberá de entregarse a solicitude. O custe para as familias deste servizo están regulados na ordenanaz fiscal número 15 do Concello de Narón: 8,15 euros por participante e quenda.

A concelleira de Promoción Social e Igualdade lembra que só se concederá unha quenda por participante, agás que existan vacantes noutras quendas. En calquera caso, as prazas cubriranse por rigorosa orde de inscrición.

Lea también

Narón urxe a colaboración supramunicipal para solventar a problemática das moscas

A alcaldesa da cidade, Marián Ferreiro, presidiu este martes 12 unha nova xuntanza da Comisión …