15 persoas inician un curso de atención sociosanitaria a persoas dependentes en institucións sociais

O concelleiro de Emprego e Promoción Económica, Álvaro Montes, acompañou hoxe ao alumnado que este luns iniciaba, no Centro Municipal de Emprego do Concello de Ferrol en Catabois, o curso (AFD) de Atención sociosanitaria a persoas dependentes en institucións sociais.

Este curso, explicaba Montes, conta con financiamento da Consellería de Economía, Emprego e Industria, cunha achega de 33.378 euros, ao abeiro da convocatoria pública de subvencións para a programación de accións formativas dirixidas prioritariamente ás persoas traballadoras desempregadas correspondente aos exercicios 2017 e 2018. Subliñou a importancia de formar a persas en situación de desemprego en atención a persoas dependentes, an procura dunha oportunidade laboral.

O curso, do que toman parte 15 alumnas e alumnos inscritos no Servizo Público de Emprego, suma un total de 468 horas lectivas, 388 son de formación específico e 80 horas de prácticas profesionais en horario de luns a venres de 9 a 14:00 horas.

Está previsto que remate a mediados de marzo. Ao termo, o alumanos obterá a súa titulación con certificado de profesionalidade desta especialidade formativa (nivel 2) que os capacita para desenvolver esta ocupación dentro da área profesional da atención social, na asistencia a persoas dependentes no ámbito sociosanitario en institucións sociais.