Galicia Ártabra Digital Noticias de Ferrol y la comarca de Ferrolterra.
Dentro da programación cultural da sede de AFundación de Ferrol, desta rolda cumpre salientar a presentación dunha notable exposición sobre o V Centenario da Reforma Protestante, que ademais se acompaña dunha interesante mostra sobre a historia do protestantismo en Ferrol e a súa comarca. Un dos aspectos contemplados na devandita exposición é a viaxe por España e a presenza de tres días en Ferrol de George Borrow, representando á Sociedad Bíblica, dedicada á difusión e venta da Biblia protestante.
George Borrows, o autor de “La Biblia en España”, percorreu a nación española entre os anos 1836 e 1840. Coñecido como “Don Jorgito el inglés”, estivo en Ferrol a finais do verán de 1837 procedente de A Coruña, nunha viaxe por mar no que padeceu os rigores da illa da Marola. A primeira impresión que ten de Ferrol é deprimente: “apenas entré en la ciudad se apoderó de mi alma la tristeza. La hierba crecía en las calles; por todas partes me daban en la cara las huellas de la miseria”.
Malia todo, a cidade ilustrada e o Arsenal teñen moitas cousas que logo chaman a atención de George Borrow. Paseando pola cidade escribe: “Hay en el Ferrol algunas calles buenas y no pocas casas muy hermosas. La alameda es una plantación de más de un millar de olmos aproximadamente, casi todos magníficos”.
No que atinxe a súa visita ao Arsenal non pode deixar de expresar a súa admiración: “Yo he visto los astilleros de Rusia y de Inglaterra; pero en cuanto a su grandeza y suntuosidad, no pueden, ni por un momento, compararse con estos maravillosos monumentos del extinguido esplendor naval de España”.
A súa obra “La Biblia en España” publicouse o ano 1843 en Londres, sendo editada no idioma castelán o ano 1921 en Madrid, coa tradución e unha nota preliminar de Manuel Azaña. Con independencia dos obxectivos de carácter evanxélico e proselitista que guiaron a George Borrow no seu percorrido por España, a devandita publicación constitúe un magnífico libro de viaxes.
Pouca xente coñece que George Borrow ten unha praza dedicada no barrio ferrolán do Bertón desde fai moi pouco tempo, exactamente desde o 16 de xullo de 2013.
