Recordos e recoñecementos na Cea Solidaria Anual de AFAL Ferrolterra

Preto de 130 persoas déronse cita onte á noite no Asador Gavia do Hotel Carrís Almirante de Ferrol para tomar parte na Cea Solidaria Anual de AFAL Ferrolterra. Un evento que a asociación organiza co gallo do Día Mundial do Alzheimer. A celebración daba comezo ás 21,30 horas cun photocall no que AFAL invitou ós asistentes a sumarse á campaña #RecordaQuenSon. Para iso, fotografáronse coa imaxe dunha das usuarias, Menchu, que simbolizaba a todas as persoas afectadas pola enfermidade e que non queremos esquecer nunca.

A presidenta de AFAL, Ana López, agradeceu a asistencia de todos os presentes e o apoio que brindan no día a día a AFAL. Tamén fixo unha mención especial a Equiocio por pensar na asociación para convertila na pasada edición en protagonista do seu I TRAIL Solidario e fíxolle entrega a Ana Pérez Lago dunha bandexa de Sargadelos como mostra de afecto. Tamén tivo un papel destacado Cabanas Rural Asociación de Mulleres. AFAL compartiu a través dun pequeno vídeo unha mostra dos momentos máis especiais da Tarde Solidaria de Cabanas Rural que, dende 2010, adica a AFAL. Como mostra tamén de agradecemento e cariño Ana María López entregoulle a Bea Carbón, en representación de Cabanas Rural, unha Menina de Sargadelos e esta fíxolle entrega da recadación da última Tarde Solidaria e do cadro que conxuntamente pintaron nesta cita os usuarios de AFAL e as alumnas do taller de manualidades.

Así mesmo, López puxo en valor o traballo da presidenta de honra, Milagros Prieto, e de Jesús Victoria, voluntario incondicional da asociación, que entregaron o mellor de si mesmos durante 20 anos para facer que AFAL sexa o que é hoxe.

A súa intervención rematou cunha proxección do día a día da asociación. De seguido, familias de afectados, equipo de traballadores, voluntarios, directiva e moitos amigos e amigas da asociación compartían a cea. Entre os representantes institucionais atopábanse o senador Angel Mato; os alcaldes de Cabanas, Germán Castrillón; Valdoviño, Alberto González; os deputados provinciais Luis Rubido e Gumersindo Galego; o primeiro tenente de alcalde de Pontedeume, José Simoes, e a edil de Benestar eumesa, Raquel Caruncho; a concelleira de Promoción Social de Narón, Teresa Sabio, e os responsables de Obras, Pablo Mouriz, e Deportes, Román Romero; a concelleira de Benestar de Ferrol, Saínza Ruiz, e a voceira do PP de Ferrol, Martina Aneiros, e a edil Rosa Martínez Beceiro; a concelleira de Medio Ambiente de Fene, Mariela Aguilar; os concelleiros de Benestar de Neda, Ana Rosa Pena; Medio Ambiente, Begoña Balsa; Obras, Angel Cordero, e Deportes Antonio Seijo; os edís de Obras de Valdoviño e Cabanas, Benito Vega e Manuel González, respectivamente; o concelleiro de Deportes de Valdoviño, Sergio Saavedra, e de Servizos, Alejandro García; ou os concelleiros nedenses Ignacio Cabezón e Carmen Insua, entre outros. Un imprevisto de última hora impediu a presenza do rexidor de Cedeira, Pablo Moreda, que visitará o Centro de Día Terapéutico en próximas datas.

Ó remate da cea celebrouse un animadísimo sorteo de agasallos posible grazas á colaboración de diferentes establecementos da comarca. E, finalmente, Los Zares puxeron o broche de ouro á Cea Solidaria cunha selección do seu mellor repertorio.