Xornada de iniciación ó tiro con arco para os nenos do proxecto Grow Up With Us

O campo de fútbol de Mourente, en Valdoviño, acolleu onte unha xornada de iniciación ó tiro con arco moi especial, xa que nela tomaron parte oito nenos e nenas do proxecto Grow Up With Us. A iniciativa foi posible grazas á colaboración do Concello, a través da Concellería de Deportes, e do Club Arco A Frouxeira. Grow Up With Us é un proxecto impulsado por Decathlon Ferrol en colaboración con Dignidad que ofrece a oportunidade a nenos e nenas en acollida de disfrutar do seu deporte favorito grazas ás aportacións económicas e de material, pero sobre todo á transmisión de valores por parte dos colaboradores voluntarios nas actividades que se realizan mensualmente.

Así, durante a mañá de onte, monitores do Club Arco A Frouxeira amosaron a nenos e nenas de entre 10 e 17 anos este deporte e estes probaron a disciplina nunha xornada entretida e ó aire libre que foi moi motivadora para eles. De feito, xa pensan en continuar coa súa práctica.