Ana Carvajal e Paula Herrero, confirmadas para o Tríatlon Cidade de Ferrol

Ademais da ferrolá Melina Alonso, o Tríatlon Cidade de Ferrol contará con dúas integrantes máis do equipo elite do club local: a andaluza Ana Carvajal e a asturiana Paula Herrero.

Desta forma, o Triatlón Ferrol é o claro favorito a gañar a clasificación por clubs femininos cos reforzos das súas internacionais e o seguro que representa a participación de canteirás como Emma Romeo.

Sen poder competir despois da operación á que se acaba de someter por molestias no nocello, Miriam Casillas visitará Ferrol esta fin de semana para apoiar ás súas compañeiras e asistir a algún adestramento da Escola Javi Gómez Noya.

Contar coa presencia da primeira olímpica do club e actual Carabela de Prata forma parte dos actos conmemorativos do décimo aniversario que o Triatlón Ferrol celebra esta temporada.