Cabanas invita a veciños e visitantes a participar nunha Ruta Circular en Soaserra

O Concello continúa co programa municipal de rutas de sendeirismo para dar a coñecer o rico patrimonio natural e arquitectónico de Cabanas. Neste mes de xullo, a Concellería de Deportes invita a veciños e turistas a tomar parte na Ruta Circular en Soaserra. Aínda que a proposta é gratuíta, é preciso anotarse na concellería –casa consistorial-, enviar un correo ó enderezo cultura@cabanas.gal ou chamar ós teléfonos 981 49 59 59 ext.3 ou 674 25 88 12. O prazo abrirase este luns, 24 de xullo e concluirá o venres 28 –ás 14 h-.

A ruta celebrarase o sábado 29 –en principio estaba previsto para o domingo, pero trasladouse ó coincidir na xornada central da Romaría de Santa Marta-. O punto de partida para quen non coñeza o terreo será a consistorial ás 9,45 horas e, para quen o prefira, ás 10 h no igrexario de Soaserra. O percorrido, duns 10 kms, discurrirá pola parte alta de Soaserra ata adentrarse nas Fragas do Eume. Punto éste de retorno ó templo. O tempo estimado é de tres horas e a dificultade da ruta é moderada, cun desnivel acumulado de 280 m.