Inés Santiago, única sub-23 convocada para as Series Mundiais de Hamburgo

Inés Santiago competirá este sábado nas Series Mundiais de Hamburgo e ten moitas opcións de ser seleccionada
para o Mundial de relevos mixtos do domingo, xa que formou parte do relevo campión do mundo en categoría junior e sub-23.

Na cita do máximo circuíto internacional, a promesa do Triatlón Ferrol non se marca un posto como resultado polo que loitar senón, aprender da propia competición. “O ano pasado fixen o meu debut en Series Mundiais aí e aprendín moitísimo. Gustaríame volver aproveitar a oportunidade que me dan gañando experiencia”, avanza a ferrolá, que en 2016 finalizou nun sobresaínte 33º posto.

As Series Mundiais de Hamburgo desenvolveranse en distancia sprint -750 m de natación, 20 km de ciclismo e 5 km de carreira a pé- desde as 14:10h deste sábado.