A Deputación financia a reparación das casetas das praias de Valdoviño e a creación de novos parques biosaludables

Caseta de Valdoviño – Deputación da Coruña

O Boletín Oficial da Provincia publica hoxe a formalización dos contratos de dúas obras do Plan de Acción Social (PAS) en Valdoviño, que supoñen un investimento por parte da Deputación de máis de 233.000 euros. O primeiro deles consiste no mantemento e reparación das instalacións municipais en varias praias do concello, mentres que o segundo permitirá a renovación de oito parques infantís e a creación de zonas biosaludables destinadas ás persoas maiores.

A Deputación da Coruña destina 57.444,72 euros aos traballos nas praias, que foron adxudicados á empresa Jardinería Arce, S.L. e que terán unha duración aproximada de 3 meses.

As obras consistirán na reforma das casetas de madeira da Frouxeira, O Río, O Rodo e Pantín, nas que se sitúan os aseos públicos e os locais de socorrismo. Os fondos provinciais custearán a substitución das carpinterías e das táboas das fachadas en mal estado, a aplicación dunha imprimación para protexer a madeira dos fungos e a reposición de lousas nas cubertas. No caso da caseta da praia do Río, tamén se acometerá a instalación dun novo bombeo de augas fecais ata a rede municipal de saneamento, o que permitirá eliminar a fosa séptica coa que conta na actualidade.

Zonas de ocio e deporte

Doutra banda, formalizouse o contrato coa empresa Jardincelas S.L. para o mantemento, conservación e mellora de parques infantís e zonas dedicadas ao ocio e a realización de actividade física para as persoas maiores.

A Deputación da Coruña financia estes traballos cun total de 176.355,41 euros, co obxectivo de renovar as instalacións e adaptalas ás normativas, garantindo así a seguridade dos usuarios

Os parques infantís que se renovarán e ampliarán serán os da Frouxeira, O Rodo, O Lago, Vilarrube, Montefaro e Aviño, mentres que se crearán novas zonas para os máis pequenos en Loira e Vilaboa, parroquias nas que na actualidade non existe ningún espazo para a infancia.

Os traballos contemplan a substitución dos xogos en mal estado, a limpeza e revestimento con imprimación daqueles que cumpran as normativas e o acondicionamento dos terreos para eliminar os desniveis.

Este proxecto tamén inclúe a creación de catro parques biosaludables, que contarán con diversas máquinas adaptadas para facilitar a realización de actividade física ás persoas maiores. Estas instalacións situaranse no Rodo, O Lago, Vilarrube e Vilaboa.

Lea también

Decomisados en Mugardos 167 kilos de vieira y los utensilios empleados para extraerlos ilegalmente

La Patrulla de Protección de la Naturaleza (Paprona) de la Guardia Civil en colaboración con …