O BNG pídelle ao goberno que esixa a Defensa o mantemento das súas instalacións

O Bloque Nacionalista Galego de Ferrol quere chamar a atención sobre os vertedoiros incontrolados, mesmo con material contaminante, que existen en propiedades incluidas no convenio co Ministerio de Defensa como é o existente nas baterías de Lobateiras no Pieiro.

A situación é tan singular que o Ministerio de Defensa propietario destas instalacións non ten ningunha obriga de limpeza nen mantemento destas propiedades e o Concello que non ten ningunha competencia sobre estes terreos ten adquirida unhas responsabilidades de conservación que non exerce pero que tampouco quere esixir ao titular dos terreos que é o Ministerio de defensa, como esixe ao resto de propietarios da cidade.

Para o BNG é fundamental que «mudemos a perspectiva e os obxectivos que ten este Concello para co convenio co Ministerio de Defensa. Cumpre, por tanto, que en lugar de insistir en modificar o convenio, como fixo o PP, iniciemos o proceso de anulación do mesmo xa que se evidencia que é unha ruina, as propiedades incluidas nel, e que o concello non dispón dos medios necesarios para manter unhas instalacións que non son súas e cuxo propietario desentendese das mesmas«.

Dende o BNG «cremos que as aspiracións municipais non poden pasar por incrementar o patrimonio en ruina e abandonado nunha cidade que non ten recursos económicos para mantelo e por tanto, cumpre esixir ás administracións propietarias destes inmobles que paguen os impostos que lles correspondan e manteña as edificacións nun estado de conservación adecuado do mesmo modo que se lle esixe a un particular«.