Valdoviño abre o prazo para optar a un dos 12 postos de limpeza de praias

O Concello de Valdoviño contratará, con cargo a unha subvención da Deputación da Coruña, a 12 peóns para a limpeza das praias do municipio. Trala publicación o pasado venres das bases na web municipal (www.concellodevaldovino.com), abríase un prazo de cinco días –que comezan a contar dende o luns- para a presentación de solicitudes, que deberán formalizarse, xunto á documentación requerida, no Rexistro Xeral da casa consistorial.

A contratación realizarase mediante o procedemento de concurso-oposición e, na fase de concurso, valoraranse unha serie de cursos formativos. Nesta liña, o alcalde, Alberto González, sinala que as accións formativas requeridas foron promovidas o pasado ano en Valdoviño polo Concello, entre outras administracións.

O contrato formalizarase baixo a modalidade de duración determinada –dous meses e medio- a tempo parcial de 20 horas semanais, en horario que se distribuirá segundo as necesidades e organización do servizo, de luns a domingo, na modalidade de contrato de obra e servizo. Os traballos consistirán na limpeza das praias, recollida de lixo e valeirado de papeleiras e colectores, así como labores de mantemento.