Tres internacionais do Triatlón Ferrol, á Copa do Mundo de Cagliari

Despois da Copa do Mundo de Madrid, Camila Alonso non descansa para poder competir na Copa do Mundo de Cagliari. Xunto a ela, as súas compañeiras do Triatlón Ferrol, Inés Santiago e Carmen Gómez, optan á praza de Series Mundiais que sairá da cita italiana.

Fronte a rivais habituais do máximo circuíto mundial, estará moi caro entrar no top-8 da proba, e ademais ser a mellor española, para cumprir o criterio da selección que dá o pase ás Series Mundiais de Hamburgo. Máis alcanzable podería ser facer un posto dentro do top-20 da proba para ser convocadas á mítica Copa do Mundo de Tiszaujavaros do mes de xullo.

Para iso, Camila Alonso deberá superar primeiro o cansazo acumulado na última proba e despois, ser mellor que a catalá Anna Godoy e que as súas propias compañeiras Santiago e Gómez. No caso da ferrolá, Inés Santiago está desexosa de empezar a competir a nivel internacional na súa primeira temporada como sub-23. Mentres, a pontevedresa Carmen Gómez sairá condicionada por unhas molestias que lle están a impedir correr.

A Copa do Mundo de Cagliari disputarase este domingo en distancia sprint -750 m de natación, 20 km de ciclismo e 5 km de carreira a pé- ás 10:30 horas.