Concello de Narón e AFAL impulsan terapias para afectados de alzhéimer na cidade

As persoas afectadas de alzhéimer ou outro tipo de demencias poderán asistir en Narón a terapias para tentar retardar o avance da enfermidade e mellorar a súa calidade de vida e tamén das súas familias e coidadores. Así, AFAL Ferrolterra prevé organizar semanalmente talleres de estimulación cognitiva nos locais sociais do Alto do Castiñeiro e de Piñeiros, achegando as terapias aos enfermos e evitando os seus desprazamentos a Ferrol.

Un proxecto posible grazas á implicación da Concellería de Acción Social e Participación Cidadá do Concello de Narón. Precisamente, será a Administración local a que ceda gratuitamente os espazos nos que se desenvolverán as terapias, de modo que Narón se suma así a outros concellos como Ares, Cedeira, Pontedeume e Valdoviño, onde AFAL xa ofrece este tipo de terapias.

Para dar a coñecer o alzhéimer e tamén as terapias, AFAL ofrecerá dúas charlas informativas. A primeira, o vindeiro martes, 28 de marzo, no local social do Alto do Castiñeiro. E, a segunda, o 6 de abril no local social de Piñeiros. En ambos casos, darán comezo ás 20 horas, con entrada libre.

Nesta liña, Concello e AFAL animan á veciñanza a tomar parte nas mesmas e, a presidenta da asociación, Ana María López, agradece moi especialmente a colaboración da edil de Acción Social, Catalina García, nesta iniciativa.