Galicia Ártabra Digital Noticias de Ferrol y la comarca de Ferrolterra.
O Baloncesto Narón recibe mañá sábado (18:30 horas, pavillón da Gándara) ao Instituto Rosalía de Castro co obxectivo de lograr o triunfo que o consolide na zona alta da clasificación e lle permita manter as súas opcións de disputar o play-off de ascenso.
O conxunto que prepara Pablo Rodríguez vén de acadar unha vitoria en Vigo diante do último clasificado e quere despexar as dúbidas que xurdiron nos últimos minutos do partido, no que viu como o equipo rival recurtou a cómoda diferenza que os naroneses abriran na primeira parte. Enfrente terá un combinado que, se ben está por debaixo na clasificación, foi quen de lles gañar na primeira volta (93-80).
O técnico do Baloncesto Narón define o Instituto Rosalía como un “rival complicado: levan xogando moito tempo xuntos e é un equipo de canteira que conta ademais con xogadores que teñen experiencia en LEB Ouro e LEB Prata”. Nese sentido, destaca o equilibrio entre o xogo exterior –“Pablo Posse, Antón Bouzán e Darío Suárez son moi bos tiradores”, di- e o interior, “con pívots moi fortes que saben ler o xogo”.
Para este encontro, Rodríguez poderá contar con todo o plantel, logo de que Stoll xa se recuperara dos puntos que lle deron na man no partido contra o Chantada e de que Alberto Seco mellorara do seu proceso gripal. Para o adestrador do Baloncesto Narón, “os dous equipos temos un alto ritmo de xogo, co que é de supoñer que ámbolos dous estaremos cómodos e coido que a vitoria será para quen estea mellor en defensa”.
O adestrador do Baloncesto Narón asegura que esta xornada é fundamental para manter vivas as esperanzas de colarse na fase final da competición –agora mesmo a terceira praza está a dous triunfos-, xa que a vindeira semana terán que desprazarse ata León para xogar contra o terceiro clasificado, que marca precisamente o límite da zona nobre da categoría. “Ao longo deste mes”, explica Rodríguez, “decidirase que equipos pelexarán por esas prazas ata o final da liga regular e nós queremos estar aí. Temos esa ilusión e, para iso, temos que gañar, aínda que sabemos que non vai ser nada doado”.
