Cabanas acolle a presentación do Grupo de Acción Local do Sector Pesqueiro Golfo Ártabro

O Concello de Cabanas acollerá a presentación do Grupo de Acción Local do Sector Pesqueiro Golfo Ártabro Norte. Así o avanzou esta mañá o alcalde, Germán Castrillón, que emprazou a particulares, asociacións, confrarías e entidades públicas a participar na xuntanza e informarse así de primeira man da liña de axudas que se abre para o territorio. A cita celebrarase o 11 de outubro ás 19:30 horas no salón de plenos do consistorio (rúa do Concello, no 3).

Nela, explicarase polo miúdo quen pode acceder a estas axudas, os requisitos que hai que cumprir, a tipoloxía de proxectos que se poden presentar, a intensidade das axudas que se poden recibir, os trámites a seguir e a documentación a presentar, e os prazos de presentación das mesmas, entre outros.

O Grupo de Acción Local do Sector Pesqueiro Golfo Ártabro Norte é unha entidade colaboradora da Consellería do Mar para a xestión das axudas do Fondo Marítimo e da Pesca 2014-2020 no ámbito territorial que abarca dende Narón ata Paderne.

Os interesados en obter máis información poden acceder a ela a través do seguinte enlace: http://galpgolfoartabronorte.blogspot.com.es/