Narón acolleu este domingo a terceira edición da festa infantil

O Parque fluvial de Freixeiro acolleu este domingo a terceira edición da «Festa infantil Cidade de Narón», organizada pola Concellería de Festas con motivo do remate da tempada estival. Desde as doce deste mediodía decenas de nenos e nenas foron chegando cos seus familiares e amigos para gozar dunha xornada lúdica na localidade. Inchables, un circuito de karts a pedais; touro mecánico: obradoiros de globoflexia, «pompeiros» e maquillaxe –con monitores da empresa La Guagua- e camas elásticas formaron parte das actividades desenvolvidas esta mañá e que continúan ata última hora da tarde. Sen dúbida un dos maiores atractivos para os máis novos foron os inchables acuáticos, de diferentes tamaños según as idades, e nos que os asistentes teñen que gardar pacientemente cola a determinadas horas para poder subirse, debido á excelente aceptación que rexistran.

A concelleira de Festas, Mar Gómez, asegurou que a convocatoria foi todo un éxito. «Desde que comezou a festa, ás doce, ao Parque fluvial de Freixeiro chegaron moitas persoas dispostas a pasar un bo día. O tempo acompañou e desde o Concello estamos moi satisfeitos coa resposta da veciñanza que  participou neste evento festivo, agradecento especialmente a gran implicación dos familiares dos nenos e nenas que estiveron na festa» indicou a edil.

No evento non faltaron unha xinkana de habilidades ás 12.00, cun circuito de obstáculos a superar cunhas «gafas idiotizadoras», que distorsionan a visión, e o musical «Lúa en Vila dos Libros», a partir das 13.00 horas, actividades estas dúas que tamén congregaron a numeroso público. Xa pola tarde retomouse a festa a partir das 16.00 horas, coas atraccións instaladas para a ocasión, cun «CantaeBaila», no que non faltou música da Guagua e tradicional galega e coa actuación do Paiaso Popin a partir das 18.00. A esperada Festa da espuma e da auga, que comezou ás 19.00 horas, puso o broche de ouro, como en anteriores edicións, a esta convocatoria. Todas as actividades, así como as atraccións, foron de balde.