O BNG esixe ao goberno ferrolán recuperar os montes do Chá para os seus veciños

O Bloque Nacionalista Galego de Ferrol demandou no día de hoxe ao alcalde da cidade que «axilice e deixe de dilatar o proceso para a elaboración dos informes xurídicos aos que este goberno se comprometeu coa comunidade dos montes do Chá a elaborar a finais do ano pasado».

Os nacionalistas aseguraron que «despois de 8 meses non se ten avanzado nada nesta cuestión, e para o BNG é fundamental que se empece a dar algun paso de cara a recuperación destes montes por parte dos seus lexítimos propietarios que son os veciños e veciñas de Brión e Doniños».

O BNG considera que desde o goberno de Suárez «non se está a actuar coa suficiente dilixencia de cara a avanzar o expediente que posibilite a devolución dos Montes de Chá aos veciños e veciñas para uso en mancomún». É por iso que o BNG anuncia que ten previsto abordar esta cuestión na vindeira reunión da Comisión de Facenda e Patrimonio, prevista para o mércores 22 de marzo, para esixir do goberno local un compromiso firme para posibilitar a execición do acordo plenario do mes de xullo do ano pasado «no que este Concello recoñecía oficialmente que os montes do cha son dos veciños e veciñas».

O BNG demanda ademais que «sendo o Concello o titular destes montes, que asuma a súa responsabilidade e comece a controlar e impedir que se continue a facer por parte de particulares un aproveiramento de madeira que existe nestas propiedades sen que o actual goberno faga nada para evitalo».