Presentada a quinta edición da Exposición Canina Concello de Narón

A concelleira de Feiras e Mercados do Concello de Narón, Mar Gómez, e o presidente e a tesoureira da Sociedade Cinolóxica Galega Expogal, Javier Davila e Beatriz López, respectivamente, presentaron esta mañá a quinta edición da Exposición Canina Cidade de Narón. O evento, cuxa entrada é de balde, celebrarase este sábado e o domingo, no recinto feiral do Trece, en Sedes.

A programación do sábado comezará ás 17 horas coas exhibicións caninas, mantendo o formato de anos anteriores con catro categorías, destinadas a cans con e sen pedigree, estes últimos poderán obtelo durante esta fin de semana nesta convocatoria. Ao finalizar a mesma haberá unha exhibición no exterior da Asociación de Cans de Salvamento de Galicia (Casaga). Pechará o programa do sábado o certame de mascotas, con trofeos para os gañadores. A cota de inscrición na convocatoria do sábado ten un custe de tres euros e poden formalizarse o mesmo día a partir das 16 horas.

O domingo terá lugar unha exposición para a que as persoas interesadas en inscribirse –a prezo de 20 euros- poderán facelo no recinto a partir das 11 horas. A mostra desenvolverase ata o mediodía, tempo no que se realizará a preselección dos mellores exemplares, e a partir das 16:30 horas procederase á entrega de trofeos. Un xuíz internacional encargarase de valorar aos cans que participen, ao tratarse dunha proba puntuable para o campionato galego e na que o resultado obtido en Narón contabiliza á hora de poder optar a esta proba autonómica. Así mesmo, procederase a entregar os diplomas aos gañadores do campionato galego de 2015.

A organización calcula en que participen uns 150 cans procedentes de diferentes concellos de Galicia, aínda que a cifra podería incrementarse porque o prazo de inscrición estará aberto ata o último día, para así facilitar a asistencia aos interesados.

Davila agradeceu «a constante colaboración do Concello de Narón a esta convocatoria ano tras ano», e aludiu tamén ao cartel da exposición canina, que este ano «ten un trasfondo dun proxecto sobre a educación á cidadanía en materia de convivencia cívica cos animais, neste caso os cans, e que nos gustaría iniciar co Concello de Narón polo bo trato que sempre ten con nós».

A concelleira de Feiras e Mercados, Mar Gómez, recordou que a boa acollida que ten esta Exposición Canina permitiu consolidar este evento no calendario de feiras do municipio. «Animo a todos os veciños e veciñas a desprazarse esta fin de semana ata o recinto feiral do Trece para poder ver a calidade dos cans que se presentan a este tipo de convocatorias e tamén o traballo que realizan asociacións como Casaga en materia de adestramento de equipos formados por un guía e un can para tarefas como a localización de persoas desaparecidas». A edil agradeceu o traballo da organización e das entidades e colectivos que xunto co Concello naronés colaboran nesta iniciativa.