Galicia Ártabra Digital Noticias de Ferrol y la comarca de Ferrolterra.
No marco da súa ampla estratexia de apoio ao tecido empresarial galego para gañar competitividade a través da súa inmersión na industria 4.0, a Xunta celebra entre hoxe e mañá no CIS Galicia, en Ferrol, un seminario tecnolóxico no que arredor dun cento de representantes do naval galego coñecerán dun xeito práctico o salto competitivo que a realidade virtual e aumentada e o big data poden propiciar no sector.
O director da Axencia Galega de Innovación (Gain), Manuel Varela, explicou durante a apertura do seminario que a incorporación de tecnoloxías avanzadas ligadas á fábrica intelixente é particularmente estratéxica nunha industria na que se producen estruturas de gran tamaño. «A realidade virtual e aumentada permite incrementar a seguridade e a eficiencia, minimizando o risco de erros de deseño e fabricación e os custos asociados a eles. No naval, isto non supón unha vía para sobrevivir, senón para liderar», expuxo, ao tempo que destacou a creación de emprego cualificado que estes procesos supoñen.
A participación de representantes de empresas do naval e doutros sectores afíns, de centros tecnolóxicos, das universidades e de varios clústers no seminario está en liña coa prioridade da Xunta de incentivar a colaboración público-privada e a transferencia de coñecemento como eixes das súas políticas de innovación. «Ademais de dar a coñecer os avanzados equipamentos do CIS como recursos de apoio para a incorporación de tecnoloxías avanzadas no naval, sabemos que a interacción entre os diferentes axentes do Sistema Galego de Innovación que propician este tipo de xornadas está a servir como punto de partida de novos proxectos e iniciativas de colaboración», destacou o director da Gain, que puxo como exemplo de traballo conxunto as tres unidades mixtas que desenvolven solucións industriais avanzadas no marco do naval.
Demostración real e virtual
A xornada de hoxe comezou cun percorrido por tres demostradores tecnolóxicos específicos para o sector naval, unha especie de prototipos deseñados para mostrar en vivo as posibilidades reais de varias tecnoloxías. En primeiro lugar, os participantes coñeceron de preto un demostrador de composites e outro de fabricación aditiva, que lles permitiron comprobar as vantaxes do uso de novos materiais e de técnicas láser na fabricación de pezas de embarcacións a gran escala.
O terceiro demostrador trasladou os visitantes á cova de realidade virtual do CIS, na que puideron contemplar a escala real a recreación dun sistema completo de soldadura robotizada a partir dunha maqueta elaborada impresa en 3D. Deste xeito, combinouse nunha única demostración o coñecemento sobre as vantaxes da realidade virtual e da impresión de maquetas en 3D escalables nos procesos de deseño, capaces de reducir considerablemente os elevados custos que supón a produción de prototipos tanto en termos económicos como de tempo.
O seminario continuará mañá coa difusión e demostración das vantaxes do software de xestión e do big data –tecnoloxías de almacenamento e manexo de enormes cantidades de datos–, un ámbito no que a Xunta financia un nodo de computación que se porá ao servizo do tecido empresarial galego nas vindeiras semanas a través do CIS, en colaboración co Centro de Supercomputación de Galicia (Cesga).
Estas xornadas teñen lugar no marco da iniciativa Shipbuilding 4.0, na que, coa colaboración do centro tecnolóxico Aimen, a Consellería de Economía, Emprego e Industria traballó conxuntamente co sector naval galego para recuperar o liderado competitivo e tecnolóxico dos estaleiros galegos no menor prazo posible. O obxectivo e contribuír de xeito decisivo ao avance do sector impulsado pola Xunta, que xa se traduciu en 2015 nun incremento dun 50% na carga de traballo dos estaleiros galegos, grazas a contratos por valor de máis de 2.000 millóns de euros.
«Mediante o Naval 4.0 investimos dous millóns de euros para que o naval galego estea entre os líderes da revolución tecnolóxica do sector a nivel internacional», sinalou Varela, que enmarcou esta iniciativa nas políticas coordinadas de impulso da industria 4.0 que está a levar a cabo a Xunta: a Estratexia de Especialización Intelixente de Galicia (RIS3), a Axenda de Competitividade Galicia-Industria 4.0 e o Plan Estratéxico de Galicia 2015-2020.
