O humor en tempos convulsos ou os despistes calculados

jjburgoa@hotmail.com-TIRANDO A DAR

EXPOSICIÓN

Por mor da celebración dos 50 anos da creación por Quino da personaxe de  Mafalda, a nena máis irreverente do humor gráfico, a Biblioteca Municipal ferrolá está a celebrar unha interesante exposición bibliográfica titulada “O humor gráfico e Ferrol”.

Na exposición, que mostra os fondos sobre humor gráfico existentes na Biblioteca de Ferrol, faise un percorrido por unha serie de autores de España en xeral e de Galicia en particular (cunha pequena extensión do tema a Argentina) que, como testemuñas do seu tempo, amosan a problemática cotiá desde o seu particular punto de vista, moitas veces divertido, outras irónico ou mesmo crispado.

Pódense ver nesta exposición obras de ilustradores españois, desde Mingote a Forges, humoristas galegos, desde Castelao a Cebreiro, e autores ferroláns, desde Xaquín Marín a Siro López, pasando polas portadas de revistas emblemáticas como a madrileña La Codorniz ou a catalá Cu Cut, ademais de xoias bibliográficas locais como un exemplar de Ferrol Grotesco, de comezos do século XX.

Quizais sería de interese que este notable labor que está a levar a cabo a Biblioteca Municipal amosando e dando a coñecer os seus fondos bibliográficos, puidese ter lugar nun marco máis accesible ao público que a última planta do edificio da Biblioteca. Poderíase pensar para iso nalgún da planta baixa, habilitado con ese obxecto.

PRAZA DO HUMOR

Na cidade de Coruña, non lonxe da Praza de María Pita, atópase a Praza do Humor, anteriormente a súa remodelación chamada a Praza dos Ovos, un lugar moi concorrido e tamén descoidado polo acostumado maltrato dos fins de semana. A praza está presidida por dos mestres galegos do humor: Alfonso Castelao e Álvaro Cunqueiro, sentados en senllos bancos.

Na mesma praza, outros persoeiros galegos, tamén esculpidos en bronce, aparecen colocados sobre pedestais: Julio Camba, Fernández Flórez e Vicente Risco, mentres que debuxados no mármore do piso da praza aparecen autores como Groucho Marx ou Mark Twain xunto a Mortadelo e Filemón ou Asterix e Obelix.

MUSEO DO HUMOR

Rematamos este percorrido no Museo do Humor de Fene, único en Galicia e un dos poucos que temos en España, un espazo de gran interese no ámbito do humorismo. Fai pouco tempo tivo lugar a celebración do XXX aniversario da súa creación, nova da que no seu intre a prensa de Ferrol e da comarca deu unha cumprida información.

Non obstante, ninguén explicou a razón da ausencia deste importante acto de Xaquín Marín, fundador do Museo e director do mesmo, con plena dedicación, ata a súa xubilación o ano 2008. Este caso lembra outro recente esquecemento ou despiste calculado: a ausencia da historiadora María Fidalgo no congreso sobre Hildegart no Ateneo Ferrolán. Me pregunto por que a prensa deste país se dedica a dar noticias máis ou menos asépticas e pouco comprometidas, e non afonda no que hai máis aló da propia noticia. Trátase de ignorancia ou cecais de medo escénico ? Xa está ben de periodistas intrépidos.