O BNG apoia a mobilización de veciños de Loureiro e O Casquido

O Bloque Nacionalista Galego de Ferrol quere expresar- mediante un comunicado- que «volverá a amosar o seu apoio á mobilización convocada polos veciños e veciñas de Santa mariña, para mañá sábado, ás 11 horas, co obxectivo de denunciar os continuos problemas que sofren os veciños do lugar do Loureiro e O Casquido polos escorrementos de terra para a vía de FEVE e o deficiente estado das barandillas e escaleiras da pasarela peonil sobre as vías e pedindo melloras para a rúa Cardosas.»

O BNG considera que o Goberno Local é o responsábel da situación de abandono da zona e da pasarela peonil sobre as vías do ferrocarril e considera que resulta incomprensíbel a negativa a executar o proxecto que ten elaborado para a mellora desta infraestrutura e que ademais conta co visto bon de ADIF.

O BNG lembra que «o colectivo veciñal de Santa Mariña ven reclamando do goberno municipal que proceda a actuar con urxencia nas zonas de Santa Mariña máis deterioradas. Así mesmo existen zonas do barrio cuxo estado actúal é bastante perigoso, como o caso do lugar dos loureiros, xa que en moitos tramos o firme comezou a ceder e mesmo existen riscos de desprendementos de terra no talude paralelo á vía do ferrocarril.»

O BNG quere que se proceda a consolidar esta vía mediante a prolongación do muro de contención existente e que remata, a día de hoxe, na rúa Loureiro e que chegue até a conclusión da rúa Cardosas e que estas obras se acometan de modo inmediato polo que deben concretarse as xestións e actuacións a desenvolver coordenadamente entre o Concello e ADIF.