O BNG denuncia nunha concentración a perda de miles de hectáreas calcinadas

As oito da tarde deste xoves día 12, celebrouse unha concentración ante a sede da Xunta de Galicia, na praza de Camilo José Cela, en Ferrol, convocada polo BNG e ao igual que se fixo en Santiago, Vigo, A Coruña, Verín, Lugo e Ourense  para  solidarizarse coa veciñanza afectada polos incendios nos montes, para denunciar esta inmensa perda e exixir unha mudanza nas políticas de prevención e de extinción de lumes.

Portando carteis nos que se leía » Lumes, Nunca mais», os concentrados escoitaron a lectura dun manifesto , no que entre outras cousas se sinala que « a cidadanía galega quere manifestar o seu fondo pesar polo incendio que entre onte e hoxe arrasou o Monte Pindo, un Monte Pindo que leva anos loitando para ser declarado Parque Natural e para que se invistise na súa protección co obxectivo de evitar esta catástrofe.

Nun único día o lume devorou máis de 1000 hectáreas. Mais o goberno galego non quixo atender as chamadas da cidadanía que reclamaba esta catalogación e a Asociación Monte Pindo Parque Natural traballou soa no medio da falta de apoio da Xunta de Galiza e da Administración central do Estado español.

A este dramático incendio sumáronse, só no día de onte, os de Negreira, Porto do Son e a Fonsagrada. Mais aínda están nas nosas retinas os do Pedroso, en Compostela, o de Rianxo, o de Boiro e Lousame, os de Monterrei e Cualedro, os do Baixo Miño etc. Foron estas semanas inzadas de incendios con características terríbeis: un aumento de grandes incendios con moita superficie afectada e un incremento importante de niveis 1 e con serio perigo para a poboación pola proximidade a núcleos habitados, o que implicou en que en ocasións fose a propia veciñanza a que tivo que impedir que o lume chegase ás casas.

Fronte a esta situación dramática, a conselleira de Medio Rural, Rosa Quintana, comparecía hai poucos días no Parlamento para afirmar, como se dunha burla se tratase, que «o dispositivo funcionaba perfectamente». Fronte a esa distorsión da realidade, o que estamos a padecer é a eliminación de medidas de prevención e unha política de recortes nos servizos públicos que poñen en risco a seguranza do territorio e, en ocasións, a propia vida de galegas e galegos. A pesar do intento do PP por nos convencer de os dispositivos funcionaren perfectamente e de practicaren unha compracencia demagóxica, desgrazadamente, a realidade contrasta con aquilo que as galegas e os galegos estamos a ver, con auténtica desolación e cos nosos propios ollos, un día si e outro tamén.

A loita contra o lume comeza no inverno, require unha planificación constante de ordenación dos espazos forestais e de desenvolvemento dunha política de prevención agora inexistente. Non se nos escapa que nesta loita a medio e longo prazo, a única realmente efectiva, é preciso apostar por unha política de reactivación da actividade socioeconómica no medio rural. 

Por todo isto, para alén de non solidarizarmos coa veciñanza afectada, queremos denunciar a inmensa perda destes miles de hectáreas calcinadas, exixir medidas para paliar a catástrofe e unha mudanza radical nas políticas de prevención e de extinción de incendios. LUMES NUNCA MÁIS».