Xornadas de motivación para o emprendemento en Ferrol

A Concellería de Emprego do Concello de Ferrol, que dirixe Martina Aneiros Barros, en colaboración coa Deputación Provincial da Coruña, organiza unhas Xornadas de Motivación para o Emprendemento e o Acceso ao Financiamento, que terán lugar no Centro de Emprego do Concello de Ferrol os vindeiros días 11 e 12 de xullo (xoves e venres da vindeira semana). As xornadas son gratuítas, e as prazas limitadas polo que é necesaria inscrición previa no Centro de Emprego do Concello de Ferrol, teléfono: 981 944 195; enderezo electrónico: emprego@ferrol.es.

A edil Aneiros Barros explicou que o obxectivo destas xornadas “é fomentar o emprendemento e dar a coñecer as axudas dispoñibles para a posta en marcha de novos proxectos empresariais”. A primeira parte das xornadas, o xoves 11, comezará ás 09.30 horas coa recollida da documentación e a presentación por parte do alcalde de Ferrol e o presidente da Deputación da Coruña, Jose Manuel Rey Varela e Diego Calvo, respectivamente. Neste primeiro día abordaranse aspectos xerais do emprendemento, como a motivación e a idea empresarial; e continuarase cunha das fases máis importantes do proceso de emprender un proxecto empresarial: a elaboración do plan de empresa.

No segundo día, que contará coa colaboración do Instituto Galego de Promoción Económica (Igape), a Asociación de Jóvenes Empresarios de Ferrolterra (Aje) e a sociedade Afianzamentos de Galicia (Afigal), na primeira parte farase un percorrido sobre as axudas existentes para persoas emprendedoras. Así mesmo, a segunda parte da xornada estará dedicada ás fontes de financiamento que poden apoiar a posta en marcha dun proxecto empresarial.

As persoas interesadas en ter máis información sobre estas xornadas de motivación do emprendemento poden consultar a seguinte páxina: www.ferrol.es/emprego.