Galicia Ártabra Noticias de Ferrol y la comarca de Ferrolterra.
A Universidade da Coruña (UDC) e Tesol Group reúnen especialistas e representantes da industria para abordar os avances en novos materiais, de unión, automatización e fabricación intelixente.
A Escola Politécnica de Enxeñaría de Ferrol (EPEF) acolle, a longo do día de hoxe, a I Xornada Técnica de Materiais e Procesos de Soldadura, impulsada pola Universidade da Coruña (UDC) e máis por Tesol Group, en colaboración con Navantia, Pemamek Iberia, ESAB Ibérica e Diagnostiqa Consultoría Técnica.
A iniciativa reúne no Campus Industrial de Ferrol a profesionais do sector industrial, especialistas e persoas integrantes da comunidade universitaria para analizar as innovacións e os retos da fabricación industrial.
Ao longo da mañá, esta primeira xornada técnica contou coa participación do fundador de Tesol Group, Fernando Couñago Pérez, quen abordou o futuro da fabricación industrial; do application specialist de ESAB Ibérica, José Manuel Hernández, e do xerente rexional de vendas de EWM GmbH, Juan Díez, que analizaron os novos materiais e os procesos avanzados de soldadura; do engineering manager de Tesol Group, Jorge Urbano Martínez; quen falou da enxeñaría de soldadura e da cualificación profesional; e do welding engineer de Diagnóstica Consultoría Técnica, Antón Xosé Díaz Gómez; quen afondou no control de calidade e nos ensaios non destrutivos.
A sesión da tarde estará centrada na automatización, na robotización e na transformación dixital da industria, coa intervención do sales manager de Pemamek Iberia, Raúl Lorenzo; sobre o concepto de estaleiro intelixente (Smart Shipyard 5.0). Pola súa banda, o fundador de Tesol Group, Fernando Couñago Pérez e o sales director de Pemamek Iberia, Peter Senz, presentarán casos de éxito e aplicacións industriais nos sectores naval, da automocións e offshore.
A xornada concluirá cunha mesa redonda moderada pola directora do Centro de Investigación en Tecnoloxías Navais e Industriais (CITENI), Belén Montero, na que se debaterá sobre os desafíos que presentan os novos materiais, a intelixencia artificial e os procesos de fabricación avanzados.
