A UDC conmemora en Ferrol os 25 anos da I promoción de Podoloxía e os 26 anos da Clínica Universitaria

A Facultade de Enfermaría e Podoloxía conmemora o Día Internacional da Podoloxía cunha xornada que reuníu a profesionais, persoal docente, estudantado e a pacientes para lembrar as orixes e pór en valor a traxectoria da titulación e o seu compromiso coa sociedade.

O Salón de Actos do Hospital Naval de Ferrol foi o lugar elixido pola Facultade de Enfermaría e Podoloxía da Universidade da Coruña (UDC) para acoller, ao longo da mañá deste venres, o actos do Día Internacional da Podoloxía nos que se conmemoraron os 25 anos da primeira promoción de titulados e tituladas en Podoloxía (1998 – 2001) e os 26 anos de traxectoria da Clínica Universitaria de Podoloxía. Todo isto, baixo o lema “25 anos de vocación, docencia e servizo á sociedade” e no marco do XII Outubro UDC Saudable.

No transcurso do acto de inauguración, a vicerreitora do Campus de Ferrol, Igualdade e Responsabilidade Social, Ana Ares Pernas, asegurou que detrás destes dous aniversarios hai décadas de compromiso coa formación e coa excelencia profesional. “Conmemorar estas datas é recoñecer o papel fundamental que desempeñan como espazos de formación, innovación e de servizo á sociedade, deixando unha pegada duradeira na nosa comarca”, indicou. Tamén lembrou que “no memento histórico no que as universidades estamos chamadas a demostrar a nosa relevancia social, iniciativas coma estas constitúen a mellor resposta posible”.

O decano da Facultade de Enfermaría e Podoloxía, Pedro Gil Manso, dirixiuse ao alumnado deste centro do Campus Industrial de Ferrol lembrándolles que a primeira promoción de titulados e tituladas, da que por certo forma parte, tivo que demostrar que a podoloxía era unha carreira universitaria. “Agora vós tedes un reto distinto e máis esixente: demostrar que a podoloxía ten que estar no sistema público de saúde de xeito normalizado como o están a enfermaría, a fisioterapia ou a terapia ocupacional”, agregou. Tamén falou da Clínica Universitaria de Podoloxía definíndoa como “un centro excepcional e case único no sistema universitario español” ao tratarse dunha clínica de asistencia gratuíta situada en instalacións do sistema público de saúde e que realiza actividade docente.

Pola súa banda, a presidenta do Colexio Oficial de Podoloxía de Galicia, Ana María Requeijo Constenla, resaltou que estes dous aniversarios coinciden, ademais, cun momento especialmente importante para a podoloxía galega, logo de facerse pública a decisión de incorporar aos e ás profesionais da podoloxía aos equipos de Atención Primaria do SERGAS, “un paso que supón o recoñecemento dalgo que a nosa profesión leva anos defendendo: que a podoloxía ten moito que aportar á prevención e á atención sanitaria da poboación”, engadiu.

A xerenta da Área Sanitaria de Ferrol, María Fernanda López Crecente, salientou a “estreita e continuada” colaboración que manteñen coa Facultade de Enfermaría e Podoloxía o que garante unha formación de calidade que combina os coñecementos teóricos coa experiencia práctica. Nesta liña, puxo en valor o compromiso e a implicación dos e das profesionais da Área Sanitaria que está a contribuír á ampliación dos espazos de rotación formativa no ámbito podolóxico, ofrecéndolle ao estudantado deste centro do Campus Industrial de Ferrol novas oportunidades para completar a súa formación e achegarse á realidade asistencial.

Na súa intervención, a concelleira de Educación, Universidade e Política Lingüística, Patricia Cons Formoso, animou ás persoas e ás autoridades asistentes a “seguir camiñando xuntos, con paso firme, consolidando a Ferrol como a indiscutible capital da saúde do pé en Galicia, formando aos e ás mellores profesionais e coidando a saúde da nosa comarca”.

O pasado e o presente da profesión, protagonistas da xornada

O programa incluíu unha primeira mesa redonda centrada nas orixes da titulación e da Clínica Universitaria de Podoloxía, situada no Hospital Naval de Ferrol. Interviñeron a exsubdirectora e exdirectora da Escola Universitaria de Enfermaría e Podoloxía, Nuria Esther Varela Feal; a primeira coordinadora do título de Podoloxía, Julia María Janeiro Arocas; e o primeiro coordinador da Clínica Universitaria de Podoloxía, Francisco Alonso Tajes. A perspectiva do alumnado e das persoas usuarias estivo representada pola alumna da primeira promoción de diplomados e diplomadas en Podoloxía, María Dolores Martínez Rodríguez, e máis pola paciente da Clínica Universitaria de Podoloxía desde o ano 2012 e experta en enfermidades autoinmunes, Pilar Pazos Casal.

A segunda mesa redonda puxo o foco na realidade actual da titulación e da Clínica Universitaria de Podoloxía. Nela, participaron o decano da Facultade de Enfermaría e Podoloxía, Pedro Gil Manso; a directora do Departamento de Ciencias da Saúde da Universidade da Coruña (UDC), Carolina Rosende Bautista; e a directora da Clínica Universitaria de Podoloxía, Raquel Veiga Seijo. Tamén interviñeron o presidente da Asociación Galega de Estudantes de Podoloxía (AGEP UDC), Lois Vázquez Campos, e o paciente da Clínica Universitaria de Podoloxía desde o ano 2017 e presidente da Asociación de Diabéticos de Ferrolterra (ADF), José Manuel García Romero.

A xornada concluíu cun acto de peche e máis co descubrimento dunha placa conmemorativa nas instalacións da Clínica Universitaria Podolóxica, como lembranza desta efeméride e dunha traxectoria de máis dun cuarto de século vinculada á formación universitaria e ao servizo da sociedade desde Ferrol.